Duha ka adlaw rerouting sa Mandaue

CEBU, Philippines - Ipatuman sa Traffic Enforcement Agency of Mandaue (TEAM) ang re-routing sa mga sakyanan nga magsugod alas 4 sa kadlawon sa Nob. 1 hangtud sa tungang gabii sa Nob. 2.

Si Edwin Ermac, operation chief sa TEAM sa dakbayan sa Mandaue miingon 180 ka traffic enforcer ang ilang ipakatap sa kadalanan padulong  sa unom ka mga sam-ang.

Kini naglakip sa F.B. Cabahug sa barangay Guizo diin nahimutang ang sam-ang nga gidumala sa parokya ni San Jose, Mandaue Park,  barangay Jagobiao, pribadong sam-ang sa Canduman ug habig sa Cebu Memorial Park sa barangay Banilad.

Sa Guizo nahimutang ang duha ka menteryo nga maoy labing apektado sa rerouting sa mga sakyanan.

Gitataw ni Ermac nga ilang hatagan og konsiderasyon kadtong mga sakyanan nga adunay sakay nga senior citizen nga maglisud na sa paglakaw apan pagawason ang sakyanan human  sa pagpakanaug sanglit gidili ang pag-parking sa sulod.

Dugang pa niya nga higpit usab nga gidili ang pagpaninda sa dalan F.B. Cabahug sa paglikay sa kasamok sa lugar atol sa duha ka adlaw nga kalihukan. (BANAT NEWS)