Cortes: Tomas wa’y labot sa isyu sa ihawan

CEBU, Philippines – Gihimakak ni Mandaue City Mayor Jonas Cortes ang kalambigitan ni kanhi Cebu City Mayor Tomas Osmeña sa isyu labot sa ihawan sa dakbayan sa Sugbo nga ilang gipaninglan og buhis.

Si Cortes mipasabot nga ang pagdiskubre sa mga kalapasan sa ihawan nga nahimutang sa luna nga sakop na sa Mandaue wala nila damha nga mahitabo.

Matud ni Cortes nga ang tinuod niya nga tinguha mao lang ang pagsulbad sa baha sa Mahiga Creek hinungdan nga gidemolis ang kabalayan daplin niini. Ang task force nga gitahasan sa pagsusi sa mga panimalay sa maong dapit mao usab ang nakadiskubre sa kalapasan sa ihawan sa dakbayan sa Sugbo nga nahimutang usab sa maong lugar.

Si Cortes miingon nga daku ang iyang tinguha nga masulbad ang isyu uban sa mga opisyal sa dakbayan sa Sugbo pinaagi sa ilang panagtagbo.

Samtang nagdumili si Cortes sa hangyo sa mga informal settlers sa Mahiga Creek sa sitio Mahayag, Subangdaku nga mopahimutang sila og tulda  samtang nagpangita pa sila og ilang kabalhinan.

Matud ni Cortes nga ang maong mga pamilya nga mihangyo mao usab kadtong nagdumili sa pagbalhin sa 6.5 ektaryang relocation site sa barangay Paknaan.

Gumikan niini ang kagamhanan andam sa paghatag og pinansiyal nga hinabang sa mga informal settlers nga ilang magamit sa dapit nga ilang balhinan sa pagpuyo.

Tinguha sa demolition team nga mahuman na sa pagdemolis ang tanang kabalayan sa dili pa ang kalag-kalag. – /GMR) (BANAT NEWS)