Pangadye alang sa mga patay

CEBU, Philippines - Ang katawhan angay’ng mohimo gayud og kinasing-kasing nga pag-ampo nga malangit unta ang mga kalag sa nangamatay’ng sakop sa atong pamilya.

Mao kini ang pamahayag ni Cebu Archbishop Jose Palma diha nga gikuhaan og pamahayag kun unsay tukma nga himuon sa katawhan atol sa adlaw sa mga santos ug adlaw sa mga kalag karong Nobiyembre 1 ug Nobiyembre 2.

Si Palma miingon nga angay’ng pasalamatan ang mga santos kay pinaagi kanila mas gipalig-on pa ang atong pagsalig ug pagtuo. Matud ni Palma nga dako ang ikatabang sa pag-ampo niadto’ng mga kalag nga wala pa mahiluna.

Gihulagway ni Palma nga “wholesome practice” ang tradisyon na nga pagsaulog sa “kalag-kalag” aron paghandom sa mga minahal sa kinabuhi nga mitaliwan na.

Matud ni Palma nga dili g’yud angay’ng kalimtan ang pag-ampo, pagbisita sa mga lubong ug ang pagtuo nga bisan og sila patay na apan pabilin gihapon kita nga konektado kanila.

Sa ubang mga sam-ang, ang mga mobisita sa lubong sa ilang minahal magdala og mga sound system apan hinuon wala kini itugot sa mga menteryo dinhi sa dakbayan sa Sugbo.

Pagka karon daghan na ang mga tawo nga nagsugod na pagpanglimpyo sa mga lubnganan sa ilang minahal aron nga andam na kini karong Sabado.

Dinhi sa dakbayan, gatusan ka mga polis ug mga tanod ang ipangdistino sa lainlaing mga sam-ang aron pagsiguro nga walay kagubot nga mahitabo.

Did-an ang mga tawo nga magdala og mahait nga hinagiban ug ilimnon nga makahubog sulod sa mga sam-ang ingon man dili itugot ang pagsaba-saba. (BANAT NEWS)