Drug courier nagpatuong estudyante sikop
CEBU, Philippines - Usa ka 36-anyos nga babaye nga nagpatuong estudyante ang gidakop human nasakpang 240 ka pakete diay nga shabu ang sud sa iyang school bag dihang girekisa kini sa checkpoint sa eskina sa Carlock ug Tupas Street, Barangay Sawang Calero ning dakbayan.
Ang nasikop naila nga si Belen Baron Sagarino, taga Barangay Ermita, Cebu City. Matud pa ni Senior Inspector Chuck Barandog, hepe sa San Nicolas Police nga nahinabi sa Banat News drug courier ang suspek.
Nasayran nga gikan sa Bulacao-Pardo ang maong mga drugas nga paingon unta ihatod sa Barangay Ermita. Gikan sa Bulacao misakay og taksi ang maong babaye apan pwerting dimalasa kay na-flat ang ligid sa taxi hinungdan nga kini misakay na lang og habal-habal paingon sa iyang destinasyon.
Apan pag-abot sa checkpoint gipara sila kay wala silay gisuot nga helmet ug nagtsinelas ra ‘sab ang drayber sa motorsiklo. Apan matud pa mikanaog si Sagarino ug milakaw dayon mipara og taksi. Hinungdan nga gigukod siya sa mga polis ug gipugngan kay nagduda sila nga backpack sa estudyante ang dala niini nga wala na mabagay sa iyang hitsura ug wala sa’y klase sa adlaw nga Sabado.
Sa pagsusi sa mga pulis sa sulod sa bag nakita ang usa ka paper bag nga maoy gisudlan sa maong pinaketeng drugas.
Sigun pa ni Barandog nga duna’y gitug-an si Sagarino nga pangalan sa gikuhaan niini sa drugas sa Bulacao Pardo ug pangalan sab sa usa ka iladong drug lord sa barangay Ermita.
Matud pa sa dinakpan nga P5mil unta ang dawaton sa suspek isip suhol kun nakalusot pa kini ngadto sa Ermita.
Gitanggong sa San Nicolas Police detention cell ang dinakpan nga mag- atubang og tukmang kaso, samtang gibuhian ra ‘sab sa kapulisan ang habal-habal driver human namatud-ang namasahero ra kini. (BANAT NEWS)
- Latest
