Nag-videoke gipusil patay
CEBU, Philippines - Natusaktusak sa bala ang usa ka empleyado sa munisipyo sa lungsod sa Cordova human kini gipusil samtang nagkanta sa videoke kuyog sa iyang mga higala atol usab sa tinuig nga pangilin sa ilang kapilya sa Sitio Matab-ang, Barangay Day-as, lungsod sa Cordova.
Si Senior Police Officer 1 Larry Wagwag sa Cordova Police Station miila sa namatay nga mao si Noel Pacaldo, 46.
Matud pa nga dunay kombira sa ilang dapit ang biktima tungod sa pista ug bisita niya ang mga higala nag videoke.
Apan tungatunga sa kalingawan, mitumaw ang wala mailhing lalaki ug kalit nga gipusil sa makadaghang higayon si Pacaldo.
Human sa maong pagpamusil dali nga mipahilayo sa maong lugar ang gunman.
Napalgan sa crime scene ang lima ka mga kabhang sa kalibre 45 nga bala ug tulo ka mga deformed slugs niini.
Si Wagwag miingon nga mohimo pa sila og dugang imbestigasyon sa maong hitabo alang sa pag-ila sa mamumuno sa biktima ug ingon man ang hinungdan niini. (BANAT NEWS)
- Latest
