17-anyos suspek pagpatay sa florist
CEBU, Philippines – Usa ka 17-anyos nga lalaki ang gidakop may kalabutan sa pagpatay sa usa ka tag-iya og flower shop dihang positibong gitudlo sa mga testigos sa krimen. Ang finger prints sa minor de edad mitugma sa nakuha sa kapolisan sa crime scene.
Matud sa direktor sa Cebu City Police Office, Sr. Supt. Noli Romana, nga ila pa nga gisubay kun may kauban pa ang suspek sa pagpatay kang Daniel “Jun” Cañete, tag-iya sa JMC Wedding Creation sa may Sikatuna, Day-as.
Tulo ka testigos ang mitudlo sa minor de edad nga kauban sa biktima sa wala pa nakit-i nga patay si Cañete.
Gihimakak sa suspek ang pasangil sanglit didto lang siya sa iyang pinuy-anan sa Pooc, Talisay City sa adlaw nga gipatay si Cañete.
Laing duha ka minor de edad ang giimbitar sa City Intelligence Branch (CIB) aron ipaubos sa pagsukit-sukit kinsa gikatahong kauban sa suspek ug ni Cañete sa Biyernes sa gabii sa usa ka disco sa South Road Properties (SRP).
Gumikan sa nakuha nga ebidensiya sa kapolisan, si Romana miingon nga ilang pasakaan og kasong robbery with homicide ang suspek ug ang kauban niini. Apan mga minor de edad man sila nagkinahanglan sa Department of Social Welfare and Development (DSWD) alang sa dugang evaluation. – /GMR) (BANAT NEWS)
- Latest
