Pamilya mokiha sa mga polis

CEBU, Philippines – Mibahad nga mopasaka og kaso ang pamilya sa duha ka mga lalaking napatay sa mga sakop sa Boljoon Police Station tungod kay nagtuo silang brutal ug rubout ang pagkapatay kanila.

Ang mga kabanay sa mga namatay nga sila si Arnel Coronel ug John Michael Mejares mihulagway nga grabe ra kaayo ang naangkong mga samad pinusilan sa duha nga binuhatan sa mga polis.

Ang mga igsuon ni Coronel midangop kang Dr. Felino Bronia sa PNP Crime Laboratory -7 aron ipaawtopsiya ang patay’ng lawas sa duha ug kun makita nga dunay foul play dili sila magpanuko pagpasaka og kaso. Ang amahan ni John Michael nga si Alberto Mejares miingon nga pagpanguma ra g’yud ang panginabuhi sa iyang anak.

Gikatahong atol sa engkwentro, kauban nila ni Coronel ug Mejares si Florante Mosqueda ug ang 15-anyos niini nga anak.

Ang menor de edad nga nahinabi sa Banat News naghilak nga miasoy nga nahadlok siya kay basin unya og masuko ang mga kauban sa mga namatay kung mosulti siya labot sa nahitabo.

Apan ang direktor sa Police Regional Office -7 nga si Chief Superintendent Prudencio Tom Bañas miingon nga dili “rubout” ang nahitabo.

Si Bañas miduaw sa nasamdang si Basirgo sulod sa usa ka pribadong tambalanan kagahapong adlawa aron hatagan kini sa Medalya ng Sugatang Magiting.

Matud pang Bañas andam siya nga motabang sa iyang mga tawo nga mihimo sa ilang trabaho.

Ang engkwentro nahitabo Lunes sa hapon sa Barangay San Antonio bukirang bahin sa lungsod sa Boljoon nga miresulta usab sa pagkaangol ni Inspector Dexter Basirgo kinsa naigo sa kilid sa hawak ug bukton. – /EIM) (BANAT NEWS)