Engkanto ug agta

CEBU, Philippines – Human sa iyang mga kasinatian bahin sa mga kalag nga una nang gisaysay ni Pat Watin dinhi sa Kalag-kalag Espesyal sa nangaging mga adlaw, duna pay laing mga kasinatian ang maong negosyante nga di maesplikar sa yanong pagsabot.

Niadtong tuig 1975, usa ka tuig gikan siya naminyo ug ang iyang bana ug wala pa silay dakong negosyo, ang magtiayong Watin nagtikad kaniadto sa umahan sa iyang iyaan diha sa Barangay Biasong, dakbayan sa Talisay.

Usa ka higayon nianang tuiga, nadumdoman pa ni Watin nga ala una pasado sa hapon miadto siya uban sa duha ka bata nga pag-umangkon sa iyang bana  sa umahan aron hatdan kini og snacks.

Matud pa niya, kinahanglan pa nila nga molabang sa sapa sa Mananga kay sa pikas nga tampi man niini ang umahan.

Sumala pa niya, dihang miabot na sila duol sa umahan maoy ilang nakita ang daku kaayong kahayag nga naporma og lingin.

Uban sa maong kahayag ang usa ka babaye nga dili maklaro ang nawong tungod kay natabonan kini sa iyang taas kaayong buhok.  Matud pa niya puti ang pamanit sa maong babaye.

Imbes nga mahadlok ug mokaratel og dagan giduol nila ang maong babaye.

“Sige mi og duol, sige man sab og palayo ang maong babaye, matud nila engkanto man kuno to,” ni Madam Pat pa.

“Nag-atubang siya namo, ambot unsaon ‘to niya pagkakita namo nga iyang ulo iyang giduko unya iyang buhok iyaha mang gitabon sa iyang nawong,” dugang paghulagway niya sa maong talagsaong talan-awon.

Taud-taod pa una nawala ang maong babaye, maong mipadayon sila sa paglakaw padung sa umahan apan una pa sila makaabot sa umahan, subling mibutho ang maong babaye.

Matud ni Watin hangtud karon naglibog siya kung unsa ang mensahe sa maong babaye nga nagpakita kanila.

Gawas sa maong hitabo,  duna pay laing kasinatian si Watin. Matud pa niya gipikpik siya og usa ka agta, base sa mga libro, ang agta o Kapre sa tinagalog, usa ka matang sa “dili-ingon nato” nga nagpuyo sa kalasangan ilabi na sa mga karaang dagkong kahoy.

Matud pa sa mga estorya, dako kining tawo nga kasagaran mga lalaki, itom ang panit ug kalimotaw ray puti ug magtustos og hunsoy.

Apan ang agta nga unang nakita ni Watin iyang gihulagway nga sinawon ang panit ug “dili kaayo luto” ang kaitom niini.

Matud niya iyaha kining nahimamat sa usa ka pribadong sam-ang sa dakbayan sa Talisay samtang duna siya’y gihikay nga usa sa iyang mga kliyente.

Matud pa niya pwerti niyang kuyawa dihang may mipikpik sa iyang abaga ug sa iyang paglingi usa ka dakong tawo nga sinawon ang pagkaitom ang iyang  nakita.

Sumala pa niya, walay laing migawas sa iyang baba niadtong tungora kondili “kuyawa nako nimo uy!” apan giingong mingisi lang ang maong agta.

Gawas sa nahisgutang sam-ang makakita usab siya og laing agta duol  sa ilang balay sa Biasong. – /EIM) (BANAT NEWS)