Public hearing sa Tabunok Market karong Lunes

CEBU, Philippines - Ipahigayun karong Lunes ang public hearing sa tukuron nga bag-ong Tabunok Public Market sa dakbayan sa Talisay alas 9:00 sa buntag sa City Hall. Paminawon atol sa maong public hearing ang sentimento sa publiko labi na sa mga manindahay, mamalitay ug sa tanang habig nga adunay kalambigitan sa bag-ong tukuron nga merkado.

Human sa public hearing, desisyonan sa konseho kung feasible ba ang pagtukod sa maong edepisyo. Giawhag ni Talisay City Mayor Johnny delos Reyes ang tanang Talisaynon sa pagsuporta sa mga programa sa dakbayan tungod kay alang ra kini sa ilang kaayuhan.

“Giawhag naku ang tanan nga kaigsoonan sa pagsuporta sa kung unsa’y mga plano sa gobiyerno tungod kay isip amahan sa dakbayan kanunay nakong gitan-aw ang kaayuhan sa tanan,” matud ni de los Reyes. Si de los Reyes midugang nga hugaw na kaayo ang Tabunok Public Market busa kinahanglan na kining bag-ohon para hingpit na nga malimpyo. (BANAT NEWS)