Duha ka kanhi polis gikombikto

CEBU, Philippines - Gikombikto sa korte ang duha ka kanhi polis sa kasong pagpanulis.

Si Judge Silvestre Maamo, Jr., sa Regional Trial Court Branch 17 nipahamtang sa silot nga pagkabilanggo hangtud sa unom ka tuig batok nilang SPO1 Ahmed Lozano ug PO2 Alex Hermoso.

Sila si Lozano ug Hermoso kauban sa usa ka Jay Bolado, kinsa gipangita pa sa kapolisan, ang gikiha og pagpanulis sa usa ka negosyante nga si Jay Mark Deodoro.

Si Deodoro nipasangil nga niadtong Septiyembre 5, 2007, ang mga akusado ang nikuha sa iyang pitaka nga may sulod P41,800; driver’s license, relo balor og P5,000 ug cellphone balor og P7,000 samtang padulong siya sa iyang tindahan sa dalan A. Lopez, dakbayan sa Sugbo.

Si Lozano ug Hermoso gitangtang sa serbisyo niadtong tuig 2010 tungod sa kasong administratiba may kalambigitan sa maong hitabo. (BANAT NEWS)