Traffic enforcer nadasmagan
CEBU, Philippines - Grabeng naangol ang usa ka babayeng traffic enforcer human napunggit sa usa ka pribadong sakyanan samtang nagpalabang og bata sa dalan Jose P. Rizal, Barangay Paknaan, Dakbayan sa Mandaue.
Ang biktima mao si Evelyn Suan, 35, sakop sa Traffic Enforcement Agency of Mandaue (TEAM) nga nadestino sa nahisgotang lugar.
Si Raul Noynay, TEAM investigator nga nahinabi sa Banat News miingon nga dunay giagak nga bata molabang si Suan dihang napunggit kini sa Toyota Avanza nga gimaneho ni Zosimo Mangubat, 62, nagpuyo sa Lower Tabok sa maong dakbayan.
Maayong pagkalagpot ni Suan ug grabe ang kadaot nga naangkon sa iyang kalawasan, swerte hinuon nga wala maigo ang bata nga iyang giagak.
Daling gidala si Suan sa Chong Hua Hospital sa Dakbayan sa Sugbo samtang mitahan sa kapolisan si Mangubat. Matud pa ni Noynay si Mangubat nangangkong wala niya mabantayi ang biktima nga milabang nakurat na lang siya dihang dunay milagubo sa iyang sakyanan. (BANAT NEWS)
- Latest
