Hitman gipusil patay

CEBU, Philippines - Nagkadugo na nga nagdagan og gitiwasan pa sa pagpusil sa wala pa mailhi nga gunman hangtud namatay ang usa ka “hitman” sa Back Rubber, Basak-San Nicolas, Cebu City niadtong Huwebes sa kadlawon.

Ang biktima naila nga si Al John Ala, 34, minyo, wala’y trabaho ug nagpuyo   sa maong lugar.

Matud ni SPO1 Ruth Violango sa homicide section sa Cebu City Police Office nga nahinabi sa Banat News nga ang pangalan sa biktima ang dugay na sab nga nigawas sa mga nahitabong pagpamusil sa dakbayan pipila ka buwan ang nakalabay.

Apan wala lang nila na-establisar gumikan kay wala’y testigos nga nipatim-aw.

Sigun pa ni Violango nga ang asawa sa biktima mitug-an sab nga nakadungog na kini nga apil sa gun-for-hire si Ala.

Ang mga nagpuyo sa maong lugar miasoy nga sunod-sunod nga buto sa armas ang ila nadungog ug sa paggawas nila, nagbuy-od na ug wala na’y kinabuhi ang biktima.

Sa pagsubay sa taga homicide section moabot sa halos 50 metros ang pat-ak sa dugo ang ilang nakita sa dalan diin duda ang kapolisan nga nakadagan pa ang biktima apan kini gigukod ug gitiwasan.

Igo sa nagkadaiyang parti sa lawas ang naangkon ni Ala hinungdan sa iyang kamatayon.

Wala’y nakuha nga basiyo sa bala ang kapolisan diin sumala pa posibleng revolver ang gigamit sa gunman.

Usa sa duda sa kapolisan nga kauban ra ni Ala sa grupo sa mga hitman ang mitira sa biktima. (BANAT NEWS)