Tulo nasikop sa drug bust

CEBU, Philippines - Duha ka mga gipasanginlang level 2 drug pushers, ug  usa ka giingong supplier og drugas ang nasikop sa managlahing operasyon sa Regional Anti-Illegal Drugs Special Operation Task Group-7 nga miresulta sa pagkasakmit sa dul-an usa ka milyon ka pesos nga kantidad sa drugas.

Ang RAIDSOTG-7 nga gipangulohan ni Inspector Joey Bicoy milusad og buy-bust operation  batok sa usa ka Jason “Jojo” Secretaria sa barangay Kamagayan, Carcar City. Nasikop kini human mibaligya og usa ka gamay nga paketeng shabu sa poseur buyer sa kapulisan.

Gawas sa gamay nga paketeng napalit kaniya, nakasakmit usab sila og dugang 18 ka gagmay nga pakete, lima ka medium size packs nga nagkantidad og P177 mil sulod sa balay ni Secretaria. Nadakpan usab ang iyang supplier nga si Jonathan Jerome Pañares human mikubit sa laang sa mga polis.

Giteksan kini nga mo-order si Secretaria og drugas ug ipahatud sa Cebu South Bus Terminal. Tuod man, mibutho si Pañares ug gisugat kini sa poseur buyer ug gitunol niini ang usa ka bag nga dunay sulod nga “budol money” nga balor P50 mil ug gitunol usab ni Pañares ang dalang bag nga gisudlan og drugas nga balor P500 mil.

Samtang nadakpan usab sa buwag nga operasyon sa maong police unit ang usa ka Josefina Patiño diha sa balay niini sa Barangay Pahina San Nicolas, Cebu City.

Nakuha sa mga polis ang P1,700 cash nga gituohang halin sa drugas  ug  shabu nga nagkantidad og P236 mil. Gitanggong na sa karsel ang mga dinakpan alang sa pagpasaka og kaso kanila. (BANAT NEWS)