Pahimangno sa DILG sa mga mayor

CEBU, Philippines – Giawhag sa Department of Interior and Local Government (DILG) ang mga mayor nga mananghid sa ilang buhatan kun mobiyahe sa gawas sa nasud.

Si DILG provincial director Jerome Gonzales miluwat sa maong awhag human nibiyahe ang kapin sa 20 ka mayor sa probinsiya sa Sugbo sa South Korea. Matud ni Gonzales nga una’ng nakig-alayon kanila ang League of Municipalities in the Philippines (LMP)-Cebu Chapter labot sa paglarga sa pipila ka mayor ug nangayo og listahan sa mga lagda alang sa pagbiyahe. Apan giingong igo lang sa pagpangayo og guidelines ang LMP ug wala kini nipadayon sa paglihok sa mga gikinahanglan dokumento sa ilang opisina. Una makakuha og authorization to travel ang mga mayor kinahanglan una makompleto sa pagduso sa DILG central office ang ilang travel documents napulo ka adlaw sa dili pa sila mobiya.

Ang DILG-Cebu nagtuo nga didto na lang nananghid ang mga mayor sa gobernador labot sa ilang biyahe nga gitugot ra usab sa balaod.

Si Gobernador Hilario Davide III miangkon nga iyang gihatagan og pagtugot ang 27 ka mga mayor sa ilang pagbiya paingon sa South Korea niadtong Huwebes. – /GMR) (BANAT NEWS)