JVR, kaubanan nangayo’g lugway

CEBU, Philippines – Nangayo og napulo ka adlaw nga lugway sa pagtubag sa kaso nga gisang-at sa buhatan sa Ombudsman sila si Talisay City Mayor Johnny Delos Reyes ug kaubanan.

Ang Ombudsman-Visayas nimando kang Delos Reyes sa pagtubag sa kasong graft and corruption nga gipasaka sa usa ka Vicente Cabrera.

Ang gihatag nga napulo ka adlaw nga tagal napupos kagahapong adlawa.

Ang kaso may kalabutan sa pagkuha sa kagamhanan sa dakbayan sa Talisay sa Black Pearl Security Agency nga gikwestiyon sa Commission on Audit.  Giingong wala’y bidding ug wala moagi sa konseho ang maong agency samtang gihimong Job Order employee ang mga guwardiya. Gihulagway sa COA nga anomaloso ug naalkansi ang siyudad og minilyon ka pesos sa maong transaksiyon.

Lakip sa gikiha mao sila si City Administrator ug pangulo sa Bids and Awards Committee John Yre Delos Reyes, City Tresurer Emma Macuto, Budget Officer Edgar Mabunay ug ang presidente sa Black Pearl nga si Baltaire Balanguan. Si City Legal Officer, Atty. Alfredo Sipalay, mipasabot nga ang gipangayo nila’ng lugway gitumong aron makaandam sila og tubag ingon man makigsabot sila sa abogado ni Balanguan aron dili magkasumpaki ang ilang tubag. Gipasabot ni Sipalay nga daghan siya giatiman isip legal officer ug kinahanglan nga tutukan pag-ayo ang tubag sa Ombudsman. – /GMR) (BANAT NEWS)