14 ka ‘solvent boys’ giluwas
CEBU, Philippines – Katorse ka mga batang libud-suroy ang giluwas sa kapolisan diha sa taytayan sa Mahiga Creek sa Barangay Banilad niadtong Sabado sa gabii.
Si Inspector Areiza Otida, hepe sa Women’s and Children’s Protection Desk (WCPD) miingon nga gihimo nila kini tungod kay nakadawat sila og daghang reklamo nga maghingos og solvent ang mga bata sa maong dapit. Kauban sa rescue operation ang mga sakop sa Talamban Police Station ug ang Cebu City Public Safety Company (CCPSC).
Matud pa ni Otida nga 14 lang ang ilang nahipos tungod kay mikaratil og dagan ang ubang mga bata. Onse niini mga lalaki ug tulo ang babaye. Tungod kay nasuta nga taga Mandaue man ang mga bata, gi turnover sila ngadto sa Mandaue Social Services.
Apan mihimakak ang usa sa mga menor nga manghingosay siya og rugby. – /EIM) (BANAT NEWS)
- Latest
