Mabdos gigulgol sa bayaw

CEBU, Philippines – Patay ang usa ka babaye nga lima ka buwan nga mabdos human gidunggab ug giluglog pa ang iyang liog sa iyang bayaw sa miaging gabii sa Sitio Caningag, Barangay Bagatayam sa lungsod sa Sogod.

Ang biktima naila nga si Ivy Maquilan, 20, samtang ang suspek mao si Peterson Lumbab, 28, molupyo sa Sitio Capatagan sa samang barangay. Si Police Officer 1 Ronnel Kinain, nga nahinabi sa Banat News miingon nga gipatay sa suspek ang biktima atubangan mismo sa 3-anyos nga anak nga babaye sa biktima. Matud pa nga dunay silingan sa biktima nga nakadungog og singgit gikan sa balay ni Maquilan ug nagtuo lang kini nga nag-away ang managkapuyo apan sa pagsusi niini, nalup-og na sa yuta ang biktima.

Dali niining gitabang ang biktima ug gipangutana kun naunsa nga nagkadugo kini og maayo apan wala kini motingog, ayha lang kini mibutyag nga si Lumbab ang midunggab kaniya.  Apan tungod sa kahadlok sa duha nga mobalik ang suspek, ilang gibiyaan ang nagtinga nga mabdos. Ang kapuyo niini nga si Antonio Luceñara, 60, nahibulong sa iyang pag-abot nga naghilak ang ilang anak ug ngitngit ang ilang payag.

Nakit-an na lang niya ang iyang kapuyo nga naglubog sa yuta ug nagkadugo ug dihang iyang gitabang wala na kini maglihok, gidala kini sa Juan Dosado Memorial Hospital apan gideklarar na kini nga dead on arrival.  Sumala pa ni Kinain nga nakaangkon og samad sa iyang liog ang biktima apan ang fatal wound mao ang dinunggaban sa wala nga dughan. Ang suspetsado nga nahinabi sa Banat News miingon nga plano na gyud niyang patyon ang biktima tungod kay kanunay niining awayon ang iyang asawa.

Matud niya giatake sa kasingkasing ang iyang asawa  nga igsuon sab sa biktima tungod sa pagsige niini og pangaway. – /EIM) (BANAT NEWS)