Karsada sa Pasil Fish Port gubot pa

CEBU, Philippines – Wala makatuman ang mga opisyal sa Barangay Sawang Calero, Suba ug Pasil aron hapsayon ang karsada paingon sa Pasil Fish Port ingon man ang karsada paingon sa gawas sa mao nga baligyaanan og mga isda.

Si Kapitan Ariel Yburan sa Sawang Calero mipasalig nga magtinabangay sila nga mga opisyal sa Pasil ug Suba aron matuman ang awhag kanila ni Vice Mayor Edgardo Labella.

Si Labella miingon nga una nila nga himuon mao ang pagdili na pag-parking sa mga sakyanan sa karsada nga nahimutang kilid sa Police Station-6 nga magsilbi nga entrance paingon sa fish port.

Matud ni Labella nga himuon nila nga “one way” ang mao nga karsada ug kadtong mga sakyanan nga mogawas na gikan sa Pasil Fish Port adto na moagi sa Belgium Street nga kilid sa karaang Pasil Fish market.

Ang bise mayor miingon nga nagkasabot na sila ug ang mga kapitan sa tulo ka barangay nga did-an nila ang bisan traysikad nga makasugat sa mga sakyanan nga mosulod ug mogawas sa fish port.

Apan nasuta sa Banat News kagahapon nga hilabihan pa gihapon kasamok ang mao nga karsada tungod sa mga traysikad nga mosugat gihapon sa agianan sa mga sakyanan.

Nabantayan usab ang kahugaw sa baligyaanan og mga isda tungod sa itum kaayo nga mga lapok nga anaa sa karsada nga madala ngadto sa “improvised market” samtang baho usab kaayo ang merkado. (BANAT NEWS)