Mandaue nakadawat og pasidungog

CEBU, Philippines – Ang sagunson nga katuigan nga ang dakbayan sa Mandaue nakadawat og pasidungog maoy magsilbe nga kamatuoran sa makanunayon nga pagsuporta niini sa mga programa pagpalambo sa kahimtang sa mga kooperatiba sa dakbayan.

Si Norma Panulde, development officer sa Cooperative Development Authority (CDA), miingon nga ang kagamhanan sa Mandaue gipasidunggan kay mipakita og makanunayong suporta sa kalihokan sa kooperatiba sa ilang dakbayan.

Matud ni Panulde nga sa tuig 2012 ug 2013 ang kagamhanan sa Mandaue nakadawat og pasidungog gikan sa Gawad Parangal Awards ug ilang gilauman nga subli na usab kining mapasidunggan atol sa gikatakda nga National Cooperative Summit karong Oktubre 16 ug 18 nga anha  ipahigayon sa Waterfront Hotel and Casino-Cebu.

Samtang si Atty. Ernesto Maringuran, city cooperative development officer  sa Mandaue, miingon nga ang Gawad Parangal Awards nga ilang nadawat katulo na ka higayon mao la’y pag-ila sa ilang serbisyo pagtabang sa mga sakop sa kooperatiba.

Duga’ng ni Maringuran nga tungod sa maong pasidungog nga naangkon sa Mandaue mahimo na usab kining nominado sa national category sa paghatag og pasidungog niini.

Si Konsehal Beethoven Andaya nga maoy chairman sa Regional Cooperative Development Council mitataw sa kamahinungdanon sa papel sa mga kooperatiba pagtubag sa mahinungdanong serbisyo sa kagamhanan ngadto sa katawhan. Nunot niini si Andaya mitug-an nga ang kagamhanan sa Mandaue migahin gayud og P1.5 milyon nga soft loan program alang sa mga kooperatiba sa dakbayan nga mokabat sa P100 mil nga walay interest nga pangayoon sa kagamhanan.

Si MCCDC Secretary Emie Bustillo mibutyag nga adunay kapin sa 25 mil nga sakop sa lainlaing kooperatiba sa Mandaue nga nagtinguha karon nga maghiusa pagpahigayon sa tulo ka adlaw nga programa nga naglakip sa "Anak Mo, Lab Ko." – /RUB) (BANAT NEWS)