Retiradong sundalo nanulis

CEBU, Philippines – Usa ka retiradong sundalo ang gidakop human gitumbok nga nanulis sa usa ka LPG outlet sa Sitio Kapaping, Barangay Basak dakbayan sa Lapu-Lapu.

Si Joel Seldura, 43 anyos, kanhi sakop sa Philippine Air Force ug residente sa Mactan- Benito Ebuen Air Base sa Barangay Pajo ang nasikop sa kapolisan kuyog ang biktima nga si Wilbert Lou Talidro, 22. Si Talidro maoy cashier sa Cebu Rufrance Multigas Corporation  positibong mitumbok kang Seldura nga maoy mihapak sa iyang agtang ug gikuha ang halin sa tindahan nga moabot og P1, 280, wallet sa biktima nga adunay sulod nga P1,200 ug upat ka cellphone.

Kuyog sa mao nga suspetsado si Richard Degolacion, 36 ,  residente sa Sitio Sangi, Barangay Pajo. Si Police Officer 2 Neron Zarsuelo, imbestigador sa Lapu-Lapu City Police Office-Station 4 ang miresponde kuyog sa grupo ni Police Senior Inspector Conrado Manatad, hepe sa Special Weapon and Tactics.

Matud pa nga misulod si Seldura ug gitionan og .45 caliber si Talidro, dihang nagmagahi kini paghatag sa halin gikatahong gihapak siya niini og armas diha sa agtang dayon gikuha ang kwarta ug cellphone.

Daling miikyas ang duha ka suspek luwan sa motorsiklo, apan daling nakasumbong sa police station si Talidro hinungdan sa gilusad nga operasyon ug gilibot ang barangay Basak, ug didto nakit-an ang motorsiklo sa duha diha sa Sitio Sudtunggan.

Gawas sa kwarta nga nakuha, na-recover sa mga polis ang .45 nga pusil nga adunay walo ka bala nga adunay silencer, usa ka shotgun ug tulo ka buhing bala, usa ka half-faced nga helmet, duha ka plastic nga adunay sulod nga used oil panglimpyo sa armas ug duha ka lighter.

Apan na-trace nga ang mao nga shotgun mao  ang armas nga gikawat gikan sa security guard nga nagbantay sa usa ka hardware sa Sitio Wasiwas sa Barangay Marigondon base sa serial number niini. – /EIM) (BANAT NEWS)