Mga senior citizens gihataga’g bugas
CEBU, Philippines - Kapin sa 14,000 ka mga senior citizen ang nahatagan og tag tulo ka kilong bugas gikan sa buhatan sa Talisay City Senior Citizen's Federation ug sa Office of the Senior Citizen's Affairs (OSCA).
Ang pagpanghatag sa mga bugas kabahin sa pagselebrar sa Elderly Filipino Week sa dakbayan sa Talisay ug kini gikan sa Kapitolyo.
Gawas sa pagpanghatag og mga bugas, ang mga senior citizen naghimo sab og daghan nga mga kalihukan apil na ang mga programa sa sayaw-sayaw, kanta ug zumba.
Ang Elderly Filipino Week giselebrar gikan Oktobre 1 hangtud 7 kada tuig. Ang maong selebrasyon giabagan sa Department of Social Welfare and Development (DSWD) Field Office VII katambayayong ang mga Local Government Units (LGU) sa tibuok nasud.
Gihatagan og pasidungog sa kagamhanan ang mga tigulang tungod sa ilang natampo sa panahon sa ilang kabatan-on.
Ang tema karung tuiga “Ang Nakatatanda ay Yaman, Katuwang sa Pag-unlad ng Bayan, Pangalagaan ang Kanilang Kapakanan.”
Subay sa balaod, ang Republic Act 9994 kon Expanded Senior Citizens Act nagmando nga kinahanglan hatagan og prayoridad ug 20% nga diskwento sa pagpalit sa batakang panginahanglan ug mga serbisyo, espesyal nga 5% discount sa prime commodities ug nag-unang mga panginahanglan, 5% utility discount sa kuryente ug tubig ug konsumo. (Khacel Anne Sanchez/EIM)(BANAT NEWS)
- Latest
