Kabubut-on gitipigan ni Cabarubias

CEBU, Philippines - Nagpabilin si Konsehal Roberto Cabarubias sa Bando Osmeña Pundok Kauswagan (BOPK) tungod sa utang kabubut-on ug baruganan.

Kini ang hinungdan sa wala niya pagbotar pabor sa reorganization sa committee chairmanship sa konseho nga giduso sa mga kaalyado ni Mayor Michael Rama. Gipasabot ni Cabarubias nga sukad niadtong tuig 1989 dihang kapitan pa siya sa barangay, kaalyado na sila ni kanhi mayor Tomas Osmeña.

Matud ni Cabarubias nga sa katapusang oras atol sa botasyon alang sa reorganization una pa siya nakahukom nga dili mobiya sa BOPK.

“Ang kolor sa akong pagkatawo loyalty…Wa man sa’y dautang nabuhat ang BOPK batok nako gawas atong gihinganlan ko ni Mayor Tom og dili maayo kadtong mipirma ko kabahin sa pagbaligya sa SRP,” matud ni Cabarubias.

Gipasabot ni Cabarubias nga mipirma siya sa pagbaligya sa tipik sa lote sa South Road Property tungod kay makaayo kini sa siyudad aron makabayad sa loan.

Gihimakak ni Cabarubias nga gihulga siya ni Osmeña hinungdang nagpabilin sa BOPK. Matud ni Cabarubias nga wala sila magka-estorya ug si Osmeña gawas sa asawa nga si Konsehal Margot samtang personal ang ilang gihisgutan.

Gibutyag usab ni Cabarubias nga daghan siya og utang kabubut-on ni Osmeña tungod kay daghan kini og natabang kaniya ilabi na niadtong eleksiyon sa tuig 2010.

Subay niini si Cabarubias nagkanayon nga si Rama usa ka maayong tawo ug managhigala sila apan sa iyang panan-aw maayo usab si Osmeña.

Si Cabarubias nangayo og pasaylo sa ubang sakop sa konseho sa mao niyang desisyon. (Brenda D. Batuto/GMR)(BANAT NEWS)