Kanhi seaman milayat sa lubi patay

CEBU, Philippines - Usa ka kanhi seaman ang napalgang patay sa kalapokan kilid sa usa ka sapa sa Sitio Suba, Bahay, Sibonga kagahapon sa kaadlawon.

Ang lalaki nailhan tungod sa mga dokumento nga nakita sa sud sa iyang bag nga si Vincent Aclan, 31,  taga Lamac, Pinamungahan ug nagpuyo na sa Napo, Carcar City.

Pinaagi usab sa mga ID, passport ug ubang dokumento nasubay ang asawa niini nga si Riza Marie Aclan kinsa usa ka volunteer teacher sa Napo Elementary School.

Si Aclan napalgan ni Police Officer 3 Estanislao Chavez kinsa naagi sa maong dapit samtang padung sa Sibonga Police Station aron mo-duty.

Si PO3 Ederlino Bacusmo, imbestigador sa Sibonga Police Station miingon nga base sa ilang imbestigasyon nagduda silang mikatkat ug milayat sa punoan sa lubi duol sa nahimutangan sa lawas niini tungod sa nakitang tsinelas nga han-ay sa ubos sa puno-an. Ang kapikas niini nga si Riza nga nakahinabi sa Banat News mibutyag nga Huwebes sa gabii dihang naglalis sila sa iyang bana ug milakaw kini.

Matud niya hilomon ug wa kaayoy kaila sa ilang gipuy-an karon ang iyang bana. Matud niya dunay problema sa pamilya niini sa Pinamungahan ang bana.(Khacel Anne Sanchez/EIM)(BANAT NEWS)