Suspek sa lungkab nakuhaa’g shabu

CEBU, Philippines - Nakuhaan og duha ka paketeng shabu ang suspek sa pagpangawat sa U-Well Marketing sa dakbayan sa Mandaue niadtong Miyerkules sa hapon. Ang nadakpan mao si King Lloyd Purlas, 23-anyos, ulitawo nga taga Sitio Sta. Cruz, Guizo, sa maong dakbayan.

Si PO2 David Omambac sa Presinto 1 sa Mandaue City Police Office (MCPO) miingon nga ang mga sakop sa Task Force U-Well ang miadto sa nahimutangan sa suspek aron pagsukit-sukit kang Purlas labot sa lungkab sa tindahan nga nawagtangan og P6 milyones nga salapi ug mga alahas.

Matud ni Omambac nga samtang gihimo ang pagsukit-sukit, namatikdan nga wala nahimutang ug mikuot sa bulsa dayon labay ngadto sa yuta sa usa ka paketeng shabu.

Dihang girikisa ang suspek, maoy ilang nadiskubrehan ang gidala niining duha ka paketeng shabu, duha ka tinfoil ug disposable lighter nga gisulod sa bulsa hinungdan nga kini gidakop ug gibalhug sa detention cell. Sa pasiunang pakisusi sa task force, si Purlas mitumaw nga usa sa mga suspek sa lungkab hinungdan nga gipangita sa kapolisan. (BANAT NEWS)