Nibaligya’g motor mao’y gidakop

CEBU, Philippines - Nabalhog hinuon sa prisohan ang usa ka lalaki nga nibaligya og motorsiklo apan iyang gihulga ang nakapalit niini.

Ang nasikop mao si Jovert Cantago,  taga Consolacion samtang ang nagpakitabang sa kapolisan naila nga si Boy George Lao nga taga dakbayan sa Mandaue.

Matud ni SPO2 Jude Udtohan sa City Intelligence Branch sa Cebu City Police Office nga unang miduol sa ilang buhatan si Lao gumikan sa hulga ni Cantago nga pasakaan siya og kasong carnapping kun dili mohatag sa kuwang nga bayad.

Nagkasabot ang duha nga didto duol sa CCPO mohatag sa bayad si Lao nga P5,000 apan wala nakabantay si Cantago nga nag-atang na’ng daan ang taga CIB sa lugar alang sa entrapment.

Human natunol ang kuwarta daling gisikop si Cantago kinsa mikwestiyon pa nganong siya ang gidakop.

Sa imbestigasyon sa taga CIB gipasabot ni Udtohan nga nahimo ni Cantago nga hulgaon si Lao human matud pa wala na kini mobayad sa iyang kuwang.

Gipili niya nga sa CCPO sila magbayranay sa kahadlok nga pusilon ni Lao kung sa laing lugar sila magkita.

Hinuon kagahapong adlawa nagkasabot ang duha ka habig nga bayran na lang ni Lao ang kuwang ni Cantago ug nagkasabot sab nga dili na magkihaay.  (BANAT NEWS)