Gidemolis sa Lorega nagbagulbol

CEBU, Philippines - Nagbagulbol ang mga residente sa sitio Phantom, Lorega, dakbayan sa Sugbo sa gipahigayong demolisyon kagahapon sayo sa buntag.

Si Raquel Arce, hepe sa Prevention Restoration Order Beautification Enhancement (PROBE), nagkanayon nga sobra sa 10 ka balay ang ilang gidemolis nga nahimutang sa lote nga himuong karsada.

Matud ni Arce nga dugay na sila’ng nagpadala og notisya sa mga residente ug gani ang kagamhanan may giandam na nga relocation site ug pinansiyal nga hinabang.

Matud ni Arce nga kadtong wala modawat og pinansiyal nga hinabang dili pasabot nga dili kini laroton.

Ubang mga residente sa lugar nagkanayon nga dili makiangayon ang gihimo ngadto kanila sa kagamhanan sa siyudad tungod kay wala pa sila makapahimutang.

Apan matud ni Arce nga  giuna nila ang “road lot” og hawan human isunod ang wala ug tuong habig sa lugar.

Subay niini, sobra sa 100 ka stalls sa Unit 2 Carbon Market ang giguba sa PROBE kagahapon sa buntag.

Ang maong mga stalls gibutangan og mga bongbong ug atop ug uban niini gihimo na’ng pinuy-anan. Ang PROBE nakadawat og report nga ubang stalls gihimo na nga sugalan ug suyopanan hinungdan nga gipangguba aron malimpiyo.  (BANAT NEWS)