Basilica nangandam kang Pope Francis
CEBU, Philippines - Nangandam ang mga opisyales sa Basilica Minore del Sto. Niño alang sa posibleng paghapit sa Santo Papa karong Enero gikan sa Leyte. Mitug-an ang rector sa Basilica nga si Father Jonas Mejares nga gawas sa naandan nga pagpangandam alang sa Fiesta Senyor, dunay gitawag nga "plan B" ang executive committee kun ugaling mohapit sa Sugbo si Pope Francis.
Si Mejares nakigpulong na sa Sinulog Foundation pinangulohan ni Ricky Ballesteros, Cebu City Hall, ingon man sa Philippine National Police alang sa maong posibilidad.
"Importante ang Cebu alang sa Kristiyanismo. Kay tungod kita associated sa evangelization ug Christianization sa nasud. Dinhi man nagsugod. So maayo pud unta kung makahapit nganhi ang Santo Papa," saysay ni Mejares.
Duha ka sulat imbitasyon ang gipadala na sa Basilica ngadto sa Vatican.
Ang una gipadala sa niaging tuig aron pagdapit sa Santo Papa sa ika- 450 nga kasumaran sa pagkakaplag sa imahen sa Balaang Bata, 450 nga tuig sa presensya sa mga Agustino dinhi sa nasud, ug ang ika-50 ka tuig gikan gideklarar ang simbahan isip Basilica Minore.
Laing suwat ang gipadala sa niaging buwan aron sa pagdapit sa Santo Papa sa pagsalmot sa kalihukan alang sa Sinulog ingon man sa Kaplag Festival human gianunsyo ang pagbisita niini aron personal nga iampo ang mga nabiktima sa linog ug super typhoon Yolanda.
Dugang ni Father Harold Rentoria, pangulo sa Commission on Cultural Heritage of the Augustianian Fathers, andam sila kung modesisyon ang Santo Papa paghapit dinhi.
"We are prepared just in case the Pope decides to drop by Cebu. We'll be notified by the Vatican or the CBCP (Catholic Bishops Conference of the Philippines) since the visit is national. We have plans to check on the possible areas to receive the Pope," matud ni Rentoria.
Kun ugaling kutob ra sa airport sa Mactan ang Santo Papa gikan o padung sa Leyte, nagplano ang opisyal sa Basilica nga dad-on ang orihinal nga imahen sa Balaang Bata didto aron mabendisyonan ni Pope Francis. (BANAT NEWS)
- Latest
