Remittance center gitulis

CEBU, Philippines - Human sa nagsunod nga pagpanulis sa LBC ug sa paghigpit na niini sa ilang seguridad, gipuntariya sa mga tulisan ang laing remittance center nga Western Union kagahapong adlawa sa barangay Guadalupe, Cebu City.

Gisakiyo sa duha ka armadong tulisan ang P40,000 cash sa maong remittance center alas 12:57 sa udto diha sa ma’y R. Duterte Street, Sitio San Roque.

 Si Chief Inspector Allan Rosario, ang hepe sa Guadalupe Police mitug-an nga giapil ‘sab og dala sa mga tulisan ang tulo ka bag sa mga empleyado  nga dunay importanteng gamit. Dunay unom ka mga empleyado sulod sa maong remittance center ug usa lang ang lalaki.

Si Rosario nagtoo nga ila ra nga mailhan ang mga tulisan human sila nakuhaan og video sa CCTV (close circuit television). Usa sa mga tulisan ang nagsuot og kalo samtang ang kauban niini nagsuot og helmet.

Pipila ka mga tawo nga diha sa gawas wala makabantay nga dunay pagpanulis sulod sa maong establisamento ug nahibalo lang sila niini dihang  nangabot ang mga kapulisan ug mga sakop sa media.

Gibanabana nga milungtad lang og 10- minutos ang pagpanulis, apan milanat pa usab og 10- minutos ayha nakatawag sa kapulisan ang mga personahe sa maong remittance center. Nasayran sa kapulisan nga wala kini guwardiya.  (BANAT NEWS)