Team Rama lupig gihapon sa BOPK

CEBU, Philippines - Miulbo ang tensiyon kagahapon sa konseho sa dakbayan sa Sugbo kabahin sa gidusong lakang sa ex-officio nga si Philip Zafra  nga reorganization sa committee chairmanship sa mga konsehal. Si Zafra miduso sa duha ka sugyot ngadto sa konseho diin una niini mao ang deklarasyon sa pagbakante sa tanang komitiba ug mga posisyon.

Si Konsehal Sisinio Andales misupak sa maong lakang ug misubay kini sa second paragraph sa Section 1 Article 2 sa House Rule nga giingong nag-refer lang kini sa mga officer sa legislative body nga mao ang presiding officer,   presiding officer pro-tempore, majority floor leader, first district assistance majority floor leader, second district assistance majority floor leader, minority floor leader ug assistance minority floor leader.

Matud ni Andales nga wala sa House Rule ang sugyot ni Zafra.

“It does not mention any chairmanship of the different committees so therefore your premises is wrong!” ni Andales pa.

Niulbo sa tensyon ug nagpahigayon og duha ka minutos nga recess ang konseho apan pagkahuman sa recess nagpabilin gihapon ang tensiyon dihang subling giduso ni Zafra ang maong resolusyon ug chairmanship sa konseho diin naaprobahan kini.

Human niini, si Konsehal Hanz Abella miduso og motion alang sa adjournment sa session nga gidasonan ni Konsehal Noel Wenceslao ug diretsong gidukdok ni Bise Mayor Edgardo Labella ang maso timaan nga natapos na ang maong hilisgutanan ug migawas.

Tungod niini nagubot ang mga sakop sa konseho ug dunay misugyot nga  palingkuron isip presiding officer si Konsehal Nestor Archival hinungdan nga nakaaghat ni Labella sa pagbalik ug gipadayon ang sesyon. Dihang na-quorum na ang konseho giduso ni Zafra ang ikaduha niyang resolusyon nga mao ang reorganization sa committee chairmanship sa konseho diin ang mga sakop sa Bando Osmeña Pundok Kauswagan (BOPK) gawas kang Archival nga gihatagan og committee isip chairman sa parks and playground.

Nahitabo ang botasyon sa maong ikaduhang resolusyon ni Zafra diin siyam ang mibotar batok niini ug walo ang uyon.

Si Konsehal Roberto  Cabarubias gikatahong maoy gilauman sa Team Rama nga mopabor kanila apan wala kini mahitabo.

Human niini, si Gabuya miduso og lakang sa reorganization diin sa maong reorganization tulo lamang ka sakop sa Team Rama ang gihatagan og committee chairmanship. 

Ang nahisgutang mga konsehal mao sila si Mary Ann Delos Santos, committee on health and hospital, Abella sa trade and commerce ug James Cuenco sa tourism. Si Mayor Michael Rama nagkanayon nga normal lang ang nahitabo sa konseho sama usab sa Kongreso ug bisan asa.

Apan mitug-an si Rama nga atol sa ilang meeting, si Cabarubias mibarog ug misaad nga modapig sa Team Rama.

Si kanhi kongresista Tomas Osmeña nagkanayon nga si Cabarubias dili mapalit ni Rama. (BANAT NEWS)