Krimen may labot ang kabataan midaghan
CEBU, Philippines - Misaka karong tuiga ang mga kaso diin ang mga biktima ug nakasala mga kabataan itandi sa miaging tuig sumala pa sa kapolisan.
Gibutyag ni Police Inspector Arieza Otida sa Women’s Children Protection Desk sa Cebu City Police Office nga misaka ang gidaghanon sa krimen nga naglambigit sa kabataan itandi sa miaging tuig.
Sa milabay’ng tuig gikan sa buwan sa Enero hangtod sa buwan sa Septiyembre, 324 lang ang natala nga mga batang nabiktima sa mga krimen ug pagpangabuso, apan karong tuiga, miabot kini og 429. Samtang sa mga kaso nga ang kabataan maoy nakalapas sa balaod, gikan 158 sa miaging tuig miabot kini karon og 170 ka mga krimen.
Nag-unang kaso nga naglambigit sa mga kabataan mao ang physical injuries, rape ug acts of lasciviousness.
Ang kakuwang sa pagtagad sa mga ginikanan, kawad-on ug kamoderno na sa panahon karon maoy nakitang mga rason nganong dali nga mabiktima ang kabataan ug mobuhat og mga krimen. Nanawagan karon ang kapulisan sa mga ginikanan nga monitoron ang ilang mga anak ilabi na sa responsableng paggamit sa social media.
Hinuon sa lalawigan sa Sugbo, mikunhod ang mga kaso nga naglambigit sa kabataan gikan sa 1,127 sa miaging tuig anaa na lang kini karon sa 526 sumala pa ni Police Officer 3 Rowena Santillan sa WCPD sa CPPO. (BANAT NEWS)
- Latest
