Drayber-dispatser gipusil patay

CEBU, Philippines – Patay ang 32-anyos nga lalaki human gipusil sa barangay Mabolo, dakbayan sa Sugbo kadlawon niadtong Martes.

Ang biktima naila nga si Roel Nerosa, drayber/dispatsir ug lumad nga taga lungsod sa Sibonga.

Duna’y naamong sa maong pagpamusil diin usa ka habal-habal drayber nga igo lang nagbarug sa maong lugar ang naigo sa paa.

Matud ni SPO1 Rommel Bancog sa homicide section sa Cebu City Police Office nga nahinabi sa Banat News nga ang gunman dugay na’ng nagtambay-tambay sa lugar ug daw sa gipaabot lang ang biktima.

Human nga nakakita og higayun kalit lang miduol og mipusil sa biktima sa makadaghan nga higayun.

Ang gunman giingong yano lang nga nilakaw palayo sa nahitaboan dayon sakay sa usa ka motorsiklo nga nag-parking na’ng daan nga dunay drayber ug dayon sibat.

Igo sa dughan ang naangkon ni Nerosa hinungdan nga nakabsan kini sa iyang kinabuhi nga gidala pa unta sa Cebu City Medical Center (CCMC).

Sumala pa ni Bancog nga ila pa nga gisubay ang personal nga rekord sa biktima ug ila sab nga gisubay kung wala ba kini nakabikil sa nanglabay nga adlaw.

Gikatahong wala nagtaptap sa nawong ang gunman kinsa nagsuot og jacket. -/GMR) (BANAT NEWS)