Tulo gipusil patay sa probinsiya

CEBU, Philippines – Tulo ka tawo ang namatay sa tulo ka managlahing pagpamusil sa Probinsiya sa Sugbo niadtong nakalabay nga adlaw.

Sa lungsod sa Aloguinsan, gitagod-tagod sa bala ang lawas sa usa ka 37-anyos nga lalaki nga si Mario Lopez sa wala pa mailhi nga mga mamumuno.

Matud pa ni SPO1 Aquilino Saavedra III, desk officer sa Aloguinsan Police, nga daku ang ilang pagduda nga daghan ang mipusil sa biktima.

Nasayran sa kapolisan nga nakapatay ang biktima sa ilang lugar kapin usa ka tuig na ang nakalabay apan wala mopasaka og kaso ang pamilya sa iyang napatay.

Kini ang usa sa mga anggulo nga gisundan karon sa kapolisan.

Nakuha sa kapolisan sa crime scene ang upat ka basiyo sa .45 caliber pistol, usa ka basiyo sa 9mm, usa ka basiyo sa 12 gauge shotgun ug duha ka slugs sa bala.

Sa lungsod sa Tuburan, patay ang usa ka ex-army human gipusil sa nagsuot og bonnet sa Tuburan Public Market niadtong Lunes sa hapon.

Ang biktima naila nga si Cesar Jaranilla, 64, minyo ug nagpuyo sa Poblacion, Tuburan.

Sa imbestigasyon nasayran nga kalit lang mitungha ang usa ka motorsiklo nga gisakyan sa duha ka lalaki nga nag-bonnet ug nag-camouflage dayon pusil sa biktima. Igo sa nagkalain-laing parti sa lawas ang naangkon ni Jaranilla hinungdan nga nakabsan sa iyang kinabuhi.

Nakuha sa kapulisan sa crime scene ang upat ka deformed slug sa .45 pistol ug upat sab ka basiyo sa maong kalibre sa armas.

Sa lungsod sa Minglanilla, patay sab ang usa ka 30-anyos nga lalaki human gipusil samtang sakay sa iyang motorsiklo sa barangay Upper Calaj-an sa maong lungsod niadtong nakalabay nga buntag.

Ang biktima naila nga si Ryan Basnillo, minyo ug nagpuyo sa barangay Vito sa maong lungsod.

Samtang sakay sa motorsiklo ang biktima, duha ka motorsiklo nga dunay mga backrider ang kalit lang mipusil ni Basnillo ug misukarap sa dalan. Dali pa unta nga gidala sa Minglanilla District Hospital ang biktima apan nakabsan gyud sa iyang kinabuhi. -/GMR) (BANAT NEWS)