Towing operations ibalik na

CEBU, Philippines – Nakahukom na ang kadagkoan sa CITOM nga ilang ibalik ang pag-hire og private towing companies ug hingusgan na ang kampanya batok sa mga motorista nga magpataka og parking sa ilang sakyanan daplin sa karsada ug aseras.

Si Ruben Almendras nga maoy chairman sa CITOM miingon nga nakabantay sila nga misiaw na karon ang mga drayber nga ipasagad lang sa pagparada ang ilang mga sakyanan sa walay paghuna-huna nga makabalda sila sa pag-agi sa ubang mga motorista.

Sanglit ang CITOM aduna la’y usa ka tow truck, ang kadagkoan sa CITOM nakahukom nga mokuha sila og private towing companies aron moabag kanila paghimo’g kampanya aron pangguroyon ang mga sakyanan nga ipataka lang og parking sa karsada ug sa mga aseras.

Adto ra unya sa Cebu City Council hisguti kun pila ang ipabayad sa mga tag-iya sa sakyanan nga guyoron sa mga tow trucks ug kun pila ang mahipunta sa panudlanan sa dakbayan sa Sugbo. Ang CITOM pagka karon mohimo lang og panagsa nga pagpang-clamp sa mga sakyanan nga masakpan nila nga giparada daplin sa karsada nga makasamok sa pag-agi sa ubang sakyanan. (RUB) (BANAT NEWS)