Aseras lisud na nga again

CEBU, Philippines – Gireklamo sa usa ka magbubuhis ang mga naninda sa aseras diha sa Natalio Bacalso Avenue nga miukopar na sa agianan sa mga tawo gikan sa Cebu South Bus Terminal paingon sa dalan Leon Kilat.

Usa ka Melgredo Castillon mipadala og suwat-reklamo ngadto ni Konsehal Alvin Dizon tungod kay iyang gihulagway nga mamilegro na ang katawhan nga maglakaw sa mao nga dapit.

Matud ni Castillon nga kanunay siya nga moagi sa mao nga dapit ug natan-aw niya nga peligroso kaayo kay dunay magluto diha sa aseras gamit ang mga dagko’ng kaha.

Kini maoy hinungdan nga mapugos ang mga tawo nga anha na lang sa karsada maglakaw ug makabalda na usab sa pag-agi sa mga sakyanan.

Ang kadagkoan sa CITOM miangkon nga ang Natalio Bacalso Avenue, ilabi na diha dapit sa unahan sa south bus terminal, hilabihan ka samok nga dapit tungod sa mga tawo nga anha na sa karsada molakaw.

Kini’ng mao nga isyu apil sa mga hisgotan atol sa sesyon sa mga konsehal sa dakbayan karong buntag. (RUB) (BANAT NEWS)