Priso gipagawas sa hepe
CEBU, Philippines – Ang hepe sa Mabolo Police Station mipadangat sa iyang tubag sa milabay’ng semana ngadto kang Bise Mayor Edgardo Labella kabahin sa giingong pagpabuhi niya sa usa ka piniriso.
Ang maong piniriso mao si Marites Lampert, 41, taga dalan Pasee Annette, Maria Luisa Village, dakbayan sa Sugbo nga giingong nasikop sa kapolisan sa Mabolo niadtong Septiyembre 28, 2014 pinasikad sa warrant of arrest nga giluwatan ni Regional Trial Court (RTC) Judge Mercedita Dadole-Ygnacio sa Branch 28, dakbayan sa Mandaue sa kasong theft.
Base sa report, si Lampert gitugotang makagawas gikan sa Mabolo Police Station detention cell.
Si Senior Inspector Hartzel Peter Rosales Billedo, hepe sa Mabolo Police Station mipasabot nga si Lampert mireklamo nga sakit ang iyang ulo ug tiyan hinungdang gitugotan kining magpa-medical checkup niadtong buntag sa Septiyembre 29, 2014.
Matud ni Billedo nga dunay police escort nga mikuyog kang Lampert sa maong medical examination niini ug pagkahuman namahaw ang maong piniriso uban sa police escort dayon mibalik na kini sa detention cell.
Matud usab ni Billedo nga ang pagbiya ni Lampert gikan sa detention cell paingon sa korte sa Mandaue mga alas 7:50 sa buntag naka-record kini sa ilang blotter.
Base sa medical certificate nga giluwatan ni Dr. Condrado Diestro kinsa maoy mihiling kang Lampert ang naulahi na-diagnosed nga dunay “essential hypertension grade II” ug “non-ulcer dyspepsia.”
Si Lampert nahiling ni Diestro mga alas 6:00 sa buntag niadtong Septiyembre 29, 2014. Niadtong Septiyembre 29, 2014 si Lampert mibayad kini og P80,000 nga piyansa alang sa iyang temporaryong kagawasan hinungdan nga si Judge Ygnacio mi-order nga i-release kini sa kapolisan sa Mabolo. -/EIM) (BANAT NEWS)
- Latest
