Landslides sa Cebu City kagahapon
CEBU, Philippines – Tungod sa padayong pa-uwan kagahapon adunay mga pagdahili sa yuta nga nakadaot sa tulo ka panimalay sa Sitio Lahera, Barangay Kalunasan alas-8 sa buntag.
Matud ni Konsehal David Tumulak, pangulo sa Cebu City Disaster Risk Reduction and Management Council, ang tulo ka panimalay nagusbat apan partially damaged lang kini.
Sigon ni Tumulak nga nakabalik ra ang mga namuyo sa maong panimalay human sa clearing operations sa disaster team. Ang tulo ka nanag-iya sa balay mao sila si Edelaida Rosal, Nenita Lanar, ug Genelou Cubrado. Ang Department of Social Welfare and Services mosusi sa kadaot aron mahatagan kini og ayuda sa city government ang mga naapektahan.
Sa laing bahin, adunay natumpag nga paril sa usa ka bakeshop (Fountain Head) ug naigo usab ang balay sa usa ka Roseldo Rellanos sa Riverside, Barangay Bulacao kagahapon sa alas-9 sa buntag. Matud ni Tumulak nga tungod sa pagbunok sa uwan kagahapon, nihumok ang yuta hinungdan sa pagtumpag sa maong paril.
Kasamtangang gipa-vacate sa CCDRRMC ang panimalay tungod sa peligro sa padayong pag-ulan tungod sa Inter Tropical Convergence Zone (ITCZ) ug dunay moabotay nga bagyo karong adlaw nga Miyerkules. -/EIM) (BANAT NEWS)
- Latest
