P6.7M ang danyos
CEBU, Philippines – Mokabat sa P6.7 milyones ang gibiling danyos sa sunog sa karaang school building sa dakbayan sa Bogo niadtong Domingo sa hapon.
Adunay siyam ka lawak-saringan ang nasunog nga Gabaldon building nga natukod niadtong 1917.
Sa pakighinabi sa Banat News sa hepe sa Bogo City Fire Department, Fire Insp. Matt Riel Puno, kini mitug-an nga unang nadawat nila ang report sa sunog mga alas 5:06 sa hapon gikan sa barangay peace keeping force sa maong lugar.
Alas 5:45 napaubos sa under control sa kabomberohan ang sunog ug alas 9:05 sa gabii na gideklarar nga fire out.
Apan gipasabot ni Puno nga sa ilang final nga pagkwenta sa danyos, moabot lang sa P2.5 milyones ang danyos gumikan kay sagol konkreto ug kahoy ang nasunog nga edipisyo.
Dili pa makahatag si Puno kung unsa gyud ang hinungdan sa sunog apan duna na sila’y lead ug mga testigos.
Hinuon nagdumili pa kini paghatag og detalye kay nagpadayon pa ang ilang imbestigayon. Matud ni Puno nga kung sayo pa sila nga napahibawo, hayan ila pa mapawong ang kalayo apan sa ilang pag-abot daku na ang kayo ug lisod na kaayo ang pagpawong.
Si City Administrator Max Suico mibutyag nga ang lokal nga kagamhanan mohimo og barong-barong diin himoon ang klase sa 392 ka apektadong mga tinun-an.
Matud ni Suico nga adunay mga bakanteng lawak ang Bogo City Central School sama sa social hall ug library nga mahimo usab gamiton.
Ang klase gikatakdang magpa-dayun ugmang adlawa samtang padayong gisusi sa kabomberohan ang hinungdan sa sunog. -/EIM) (BANAT NEWS)
- Latest
