Libre cancer screening gilusad
CEBU, Philippines - Kapin sa 100 ka mga babaye sa Barangay Alang-Alang, Dakbayan sa Mandaue ang nakapahimulos sa libre nga cancer screening nga gipasiugdahan sa Zonta Club Cebu II diha sa maong barangay.
Ang libre nga cancer screening kabahin sa mga kalihokan sa tinuig nga kasaulogan sa Breast Cancer Awareness Month nga pagahimoon sa tibuok bulan sa Oktubre.
Si Alang-Alang Barangay Kapitan Mylene Sanchez nga nahinabi sa mga tigbalita nagpasalamat sa Zonta Club Cebu II tungod kay dako kini og gikatabang sa kabus nga kababayen-an sa ilang dapit.
“We are thankful to the group for sponsoring this activity. If the women underwent screening at a hospital, they would pay P300-500,” nagkanayon si Kapitan Sanchez sa iyang pamahayag.
Ang Zonta Club Cebu II chapter president Marietta Malinao nga nahinabi sa mga tigbalita miingon nga ang gihatag nila nga serbisyo naglakip sa papsmear tests nga ilang isumitir ngadto sa mga hospital alang sa dugang examination nga pagahimoon.
Nagpahigayon usab sla og mga lectures kun unsaon pag-detect sa kanser, pagtambal sa cysts ug uban matang sa motakboy nga balatian sa kababayen-an. Ang Zonta Club Cebu II nga 32 na ka tuig nga gidugayon nga natukod dinhi sa Sugbo nagtudlo usab og mga livelihood programs sa mga biktima sa pagpangabuso nga kababayen-an ug kabataan. (BANAT NEWS)
- Latest
