Kanhi sakop PAF gipaulanan og bala

CEBU, Philippines – Kanhi sakop sa Philippine Air Force nalandig sa tambalanan human gipusil sa wala pa mailhi nga gunman sa Sitio Bonbon, Barangay Ocaña, dakbayan sa Carcar niadtong Sabado sa gabii.

Ang biktima naila nga si Francis Cavan, 53, nagpuyo sa Barangay Bolinawan sa maong siyudad.

Matud pa ni Police Officer One Miguelito Abadilla sa Carcar Police nga nahinabi sa Banat News nagandam og pagkaon sa iyang binuhi nga baboy ang biktima dihang usa ka lalaki ang kalit mitawag sa iyang pangalan ug sa iyang paglingi gidiretso kini og pusil sa makadaghan nga higayon.

Naigo sa tiyan, paa ug bukton si Cavan nga dali ‘sab nga gidala sa tambalanan. Sigun pa ni Abadilla nga didto sa Carcar District Hospital nakatug-an pa ang biktima sa kapulisan nga nakaila kini sa master mind sa pagpusil kaniya.

Sumala pa nga wala ‘sab nagtaptap sa panagway ang mipusil sa biktima. Base sa impormasyong nakuha sa kapolisan gikan sa mga nakakita sa hitabo, usa ka motorsiklo ang giparking distansiya sa nahitaboan nga dunay usa ka lalaki ang nagsilbing lookout ug maoy gisakyan sa pag-ikyas sa gunman.

Nakuha sa kapulisan sa crime scene ang tulo ka basiyo sa bala sa .45 caliber pistol, samtang hangtod karon nagpadayon pa ang imbestigasyon sa kapulisan. Samtang usa ka 20 anyos nga lalaki ang nalandig sab sa tambalanan human nga kini gitabangan og kulata, gidunggab ug gihapak pa og bato sa ulo, human kini miuli gikan sa diskohan sa Sitio Butong, Suba, Bantayan.

Ang biktima naila nga si Eliseo Sevilleno, nagpuyo sa Sitio Muamboc, Sulangan sa maong lungsod. Matud pa ni Police Officer One Abito Mansing ang desk officer sa Bantayan Police, ang mga suspek mao ang magsuon nga sila si Junjun, Nestor ug Agustin Sido nga silingan ra ‘sab sa biktima. Paingon na unta nga mopauli ang biktima kauban ang iyang mga kuyog sa dihang gihagit kini og sukmagay ni Nestor, apan kalit lang kini nga gihapak og bato ni Agustin ug gidunggab ‘sab ni Junjun  ang tiyan niini.

Dali nga nakasibat ang mga suspek nga padayon pa nga gipangita sa kapulisan, samtang ang biktima ang dali sab nga gidala sa Vicente Sotto Memorial Medical Center (VSMMC). -/EIM) (BANAT NEWS)