Babaye nangawat sa boarding house
CEBU, Philippines - Nasakpang nangawat og laptop ug ubang gamit sulod sa boarding house ang usa ka estudyante sa high school sa sitio Matumbo, Pusok, dakbayan sa Lapu-Lapu.
Si Cynthia Sinoy, 21-anyos, taga sitio Solas, Punta Engaño, ang nasakpan ni Gerrico de Leon, service operator sa Yuenthai, Inc. sa Mactan Export Processing Zone-1,, kinsa nagpuyo sa maong boarding house.
Matud ni de Leon nga padulong siya mosaka sa iyang kwarto dihang natagboan niya ang suspek dala ang iyang bag nga adunay sulod nga laptop.
Nagduda si de Leon sa maong babaye hinungdan nga nitawag siya sa iyang landlord ug gidakop si Sinoy.
Ang suspek nigamit og kutsara ug usa ka puthaw sa pagguba sa lock sa pultahan.
Matud ni PO1 Jude Salazar sa Lapu-Lapu City Police Office-Theft and Robbery Section nga ang suspek usa sa gidudahang sakop sa akyat bahay gang.
May criminal record na si Sinoy sa miaging buwan sa kasong robbery.
Gawas sa bag ug laptop, nakuha sab ang usa ka gagmay’ng speakers, laptop, mouse nga nikantidad tanan og kapin sa P36 mil.
Si Sinoy niangkon nga nakapangawat siya og laing butang sa wala pa nahitabo ang pagpangawat niadtong Biyernes sa buntag.
Si Gina Sinoy, 29-anyos, iyaan sa suspek, wala nakatuo sa gibuhat sa pag-umangkon.
Pasakaan og kasong robbery ang suspek kinsa kasamtangang gibutang sa LCPO detention cell ug ibalhin sa City Jail. (BANAT NEWS)
- Latest
