CCTV camera di lang sa LBC

CEBU, Philippines -  Dili lang ang mga buhatan sa LBC ang gimandoan sa kagamhanan sa dakbayan sa Sugbo sa pagbutang og close circuit television (CCTV) camera.

Niadtong Biyernes, kapin na sa 60   ka establesamento sa dakbayan sa Sugbo ang napadalhan og suwat sa kagamhanan ug dili lang mga LBC branches.

Ang mga establesamento sulod sa malls ang dili apil sa gipadalhan og suwat kabahin sa security measure tungod kay ang mall na ang nagpatuman niini.

Ang kagamhanan sa siyudad naalarma sa sunod-sunod nga  tulis sa LBC branches diin wala’y security guards ug guba pa ang CCTV camera.

Kini ang hinungdan nga ang kagamhanan sa siyudad mibahad sa temporaryong pagpasira sa branches sa LBC nga nahimutang sa dakbayan sa Sugbo kung dili motuman sa security measures.

Ang LBC niining ulahi lang mituman na sa mando sa siyudad kabahin sa seguridad sa ilang establesamento.

Tipik sa suwat nga gipadala sa siyudad ngadto sa mga establesamento gihatagan sila og tulo ka adlaw sa pagbutang og security measures gikan sa pagkadawat nila sa nahisgutang suwat.

Ang establesamento nga mapakyas sa pagpatuman sa security measure pahatagon og “written explanation” sa kagamhanan sa Sugbo sulod sa tulo ka adlaw gikan sa pagkadawat nila sa notice.  (BANAT NEWS)