P400 mil shabu na-buy-bust

CEBU, Philippines -  Tulo ka tawo nasikop sa mga sakop sa Regional Anti-Illegal Drugs Special Operations Task Group (RAIDSOTG) sa buy-bust operation kagahapon sa buntag sa Sitio Puso, Barangay Poblacion sa lungsod sa Cordova diin kapin sa P400 mil nga balor sa shabu ang nakuha gikan sa suspek.

Ang nasikop naila nga si Roquilan Quirong, 34, ug ang usa ka menor de edad nga babaye nga kapuyo sa iyang manghod ug ang ilang amahan nga si Orlando tungod kay nakuhaan kini og kalibre .22 nga pistola.

Si Inspector Joey Bicoy, ang team leader sa maong operasyon nga nahinabi sa Banat News miingon nga ang target sa ilang operasyon mao si Roquilan nga gi-report sa iyang mga silingan nga namaligya og drugas.

Atol sa buy-bust operation mipalit ang usa ka sakop sa RAIDSOTG og usa ka bulto nga mobalor og P10 mil ngadto sa suspek apan P500 lang ang tinuod nga kwarta nga gibutang sa ibabaw ug peke na ang naa sa ilawom.

Matud pa nga mitabang og baligya ang dalagita ngadto sa kapolisan hinungdan nga sa pagtunol sa suspek sa usa ka bulto nga shabu dali silang gisikop.

Apan ang amahan sa duha ka suspek nga nasikop sab tungod kay nakuhaan kini og kalibre .22 nga armas dihang gipahigayon ang buy-bust.

Nakuha sa kapolisan ang tulo ka bulto ug 120 ka gamay nga pakete nga gituohang shabu ug ang buy-bust money nga P500.

Ang mga narekober nga shabu mokabat og P413 mil base sa presyo sa Dangerous Drugs Board apan posible pa nga mas modako  kung mabaligya na.

Ang amahan sa suspek matud pa ni Bicoy nga mibadlong na sa iyang anak ug gani mipadakop na kini sa anak kaniadto apan nakaipsot. (BANAT NEWS)