Duha ka hepe imbestigahon

CEBU, Philippines - Girekomendar nga pasakaan og kasong grave misconduct ang kanhi hepe sa lungsod sa Compostela nga si Senior Inspector Samuel Romanillos human sa pagpahigayon sa pre-charge evaluation sa Provincial Investigation Detection and Management Branch (PIDMB).

Matud ni Superintendent Rodulfo Albotra ang hepe sa PIDMB ilaha nang gipasa sa regional headquarters ang rekomendasyon.

Ang kaso may labot kini sa wala pagpasaka og kaso sa usa ka langyaw nga nakuhaan og marijuana, gipasanginlan ang hepe nga miareglo niini bugti sa kwarta, pasangil nga gihimakak sa opisyal.

Samtang ang hepe ‘sab sa lungsod sa Tabogon nga si Inspector Bonifacio Pareja Jr., imbestigahon tungod kay wala kini mopahibalo sa provincial director sa Cebu Provincial Police Office nga dunay balay nga girapido sa iyang hurisdiksyon. Matud pa ni Supt. Albotra nga duna’y standing order nga kinahanglang pahibaw-on sa mga hepe ang ilang labaw sa mga panghitabo sa ilang lugar. (Jojo C. Ugdol/EIM)(BANAT NEWS)