Lalaki gitigbas, gihapak og bato
CEBU, Philippines - Gitabangan og tigbas ug gihapak pa og bato ang usa ka 27-anyos nga lalaki sa barangay Apalan, Tuburan ala una sa hapon niadtong Huwebes.
Ang biktima naila nga si Ralph Lugo samtang ang mga suspek naila nga sila si Poene Estalane, 28, ulitawo ug Pontiano Estalane, 59, biyudo nga parehong nagpuyo sa maong lugar.
Sa imbestigasyon sa Tuburan Police nga gipangulohan ni SPO4 Edgar Dumangon ug kaubanan nasayran nga ang ka live-in sa biktima nga si Ethel ug amahan niini nga si Pontiano ang unang nag-away.
Nakamata ang biktima ug mibadlong apan giatubang ni Pontiano ug nahitabo ang tinubagay sa duha.
Mikuha og sundang si Pontiano ug gihatag sa iyang anak nga si Poene kinsa gisugo nga tigbason ang biktima apan wala nakaigo.
Nidagan ang biktima apan gigukod sa suspek ug giusban pagtigbas ug naigo sa ulo.
Si Pontiano mikuha og bato dayon hapak sa ulo sa biktima hinungdan nga kini nakuyapan apan gitiwasan pa gyud pagtigbas ni Poene hinungdan sa mga samad nga naangkon.
Gidala sa tambalanan ang biktima samtang ang amahan ug anak ang gisikop sa kapolisan kinsa gipasakaan na og kaso ug gitanggong sa karsel sa Tuburan Police Station. (Jojo C. Ugdol/GMR)(BANAT NEWS)
- Latest
