Balay girakrakan

CEBU, Philippines - Nabulit sa igo sa bala ang usa ka panimalay human kini girapido og armas sa dili muminos tulo ka mga lalaki, alas-12 sa kaadlawon sa Miyerkules  sa Sitio Lamac, Barangay Ilihan, Tabogon.

Ang maong panimalay  gipanag-iya sa magtiayong Jaime ug Judely America.

Ang imbestigador sa maong kaso nga si Police Officer Three  Gregorio Licayan sa Tabogon Police nga nahinabi sa Banat News mibutyag nga base sa ilang gihimo nga pagsusi bikil sa yuta ang ilang gisundan karon nga anggulo.

Nakuha sa crime scene ang 20 ka basiyo sa .9mm nga bala, lima ka basiyo sa 5.56 caliber (bala sa M16 Rifle), usa ka basiyo sa bala sa .45 pistol ug duha ka granada nga wala makabuto , ang usa niini wala maibot ang pin.

Matud pa ni Licayan nga atol sa pagpamusil walay natulog nga miyembro sa pamilya sulod sa maong balay tungod kay didto na sila tigkatulgan sa balay sa ilang igsuon sugod niadtong Septiyembre  25 ning tuiga tungod kay girapido ang ilang balay sa wala mailhing mga tawo.

Sa nakuha nga impormasyon sa Banat News gikan ni Police Officer Two Jason Gulben sa Tabogon Police nga niadtong Huwebes sa gabii, girapido ‘sab ang maong balay ug nakuha ang siyam ka basiyo sa .9mm ug duha ka basiyo sa M16 Rifle.

Gikatahong muabot sa 250 square meters nga yuta sa mga America ang  giangkon sa laing pamilya.

“Armado g’yud ni nga grupo, pero ato pa nga gisubay kung nangunay ba ni sa paghimo o gipangsugo ra ni ang mga gunmen,” sigun pa ni Licayan.

Apan gibutyag ni Licayan nga gawas sa isyu sa bikil sa yuta wala sab gipadaplin sa kapulisan ang mga anggulo nga personal.

Samtang ang hepe sa maong lungsod nga si Inspector Bonifacio Pareja Jr., gipaesplikar sa hepe sa  kapulisan sa lalawigan sa Sugbo Senior Superintendent Noel Gillamac  human kini pakyas nga makapahibalo kaniya sa maong hitabo.

“Actually I was flat footed pagpangutana ninyo, because the chief of police did not send me any messages about this incident so I will let the chief of police explain, why? He failed to inform the provincial director,” sigun pa ni Gillamac.

Gimandoan na ‘sab ni Gillamac ang hepe sa Provincial Investigation and Management Branch (PIDMB) sa Cebu Provincial Police Office nga tagaan og proteksiyon ang pamilyang America aron dili na masubli ang nahitabo ug pangitaon ang mga responsable. (BANAT NEWS)