Polis nihatag og kwarta kasohan sab
CEBU, Philippines - Hayan pasakaan usab og kasong bribery ang polis nga nihatag og kwarta sa usa ka opisyal aron ibalhin siya gikan sa Sugbo ngadto sa Bohol.
Si Supt. Rey Lyndon Lawas, hepe sa Regional Investigation and Detection Management Division-7, nibutyag nga nibali sa iyang pasangil ang usa ka Police Officer 1. Matud pa nga ang maong PO1 miingon nga boluntaryo ang iyang paghatag og salapi ngadto kang SPO3 Ferdinand Tumakay, kanhi chief clerk sa Regional Personnel and Human Resources and Development Division.
Sayo niini ang maong polis nipasangil nga gipangayoan siya ni Tumakay og kwarta bugti sa pagpabalhin.
Ang reklamo mao ang nakapaaghat sa RIDMD-7 sa pagrekomendar nga pasakaan og kasong grave misconduct si Tumakay.
Matud ni Lawas nga human na-establisar ang ebidensiya sa kaso, ilang nasuta nga may igong basehan ang pre-charge evaluation batok ni Tumakay.
“Na-transfer gyud siya sa Bohol, consummated gyud,” sigun pa ni Lawas.
Human nigawas sa media ang taho, giingong daghan ang nipatim-aw ug misugilon sa parehong kaso apan dili interesado nga mopasaka og kaso. (BANAT NEWS)
- Latest
