Sesyon sa Cebu City Council wala tiwasa

CEBU, Philippines - Wala pa gani madiskuter ang mga isyu nga kabahin sa agenda sa session sa konseho sa dakbayan sa Sugbo kagahapon gi-adjourn kon giundang na sa mga konsehal ang ila unta’ng sesyon. Sa wala pa mahitabo ang adjournment, si Konsehal Margot Osmeña nga maoy nag-preside sa sesyon, nangutana kini kabahin sa pagdeklarar og state of calamity kun kanus-a malibkas ang deklarasyon. Gilantugian ang maong isyu sa mga konsehal. Si Konsehal Nida Cabrera miawhag sa Local Disaster Risk Reduction Management Council (LDRRMC) aron mahibaw-an ang kadaot nga namugna sa baha dinhi sa dakbayan ug kon pila ang igahin nga budget niini.

Si Konsehal Nendell Hanz Abella miawhag usab nga hatagan og 30 ka adlaw ang LDRRMC pagsumiter sa ilang report. Human maaprobahi ang awhag ni Abella nag- recess og tulo ka minutos ang mga konsehal.

Ang mga konsehal nga sakop sa Bando Osmeña Pundok Kauswagan (BOPK) nga sila si Osmeña, Roberto Cabarubias, Alvin Dizon, Alvin Arcilla, Leah Japson, Nida Cabrera, Nestor Archival ug Sisinio Andales misulod ngadto sa caucus room ug mga pila ka minutos ang nakalabay miabot si Bise Mayor Edgardo Labella.

Si Labella uban sa mga konsehal nga mga sakop sa Team Rama ang misulod usab sa caucus room ug migawas paglabay sa 40 minutos. Dihang gipadayon na ang sesyon, si Konsehal Archival mipahigayon og privilege speech hinungdan nga si Osmeña ang mipuli nga presiding officer. Human sa privilege speech ni Archival gideklarar sa konseho ang Barangay Luz nga ubos sa state of calamity tungod sa nahitabong sunog sa milabay’ng adlaw diin 128 ka balay ang naugdaw. Apan natingala ang mga tawo nga mitambong sa sesyon diha nga miawhag og “adjournment” sa sesyon si Konsehal Abella.

Dunay usa ka konsehal nga mitug-an sa Banat News nga tinguha g’yud unta nila nga pahulipan si Konsehal Margot Osmeña pagka tsirman sa committee on budget and finance. “Naay i-introduce karon nga very controversial….For us kun ipamugos gyud ni that will split the council,” matud ni Konsehal Gerardo Carillo.

Ang mga konsehal nagkauyon nga si Vice Mayor Labella ra ang tugyanan sa pagtubag sa media. Matud ni Labella nga duna la’y problema kabahin sa “procedure” sa paghimo’g “motions” apan kuwang gihapon ang iyang pagpasabot.  (BANAT NEWS)