Lalaki tusak sa bala

CEBU, Philippines - Natusak sa bala sa kalibre .45 ang usa ka tawo sa Sitio Tamatis, Alegria, lungsod sa Cordova nga gipusil sa duha ka wala mailhing lalaki nga nagsakay og motorsiklo alas 3 pasado niadtong Lunes sa hapon.

Si Senior Police Officer 2 Vilma Degamo sa Cordova Police Station miila sa biktima nga si Cesar Marangay Torreon, 52-anyos, minyo, wala’y trabaho nga nagpuyo sa maong dapit.

Ang duha nga sakay sa motorsiklo kasarangan ang pamarug ug panglawas nga pulos nagsul-ob og helmet. Matud ni Degamo nga ang biktima diha lang sa iyang panimalay ug gihunungan sa motorsiklo ug usa ang nanaug nga maoy miduol sa biktima dayong pusil sa makadaghang higayun.

 Human sa maong pagpamusil dali nga misakay og balik ang mamumuno sa nagpaabot nga motorsiklo dayong sibat pahilayo sa maong dapit.

Ang biktima nakaangkon og tulo ka samad pinusilan sa iyang kalawasan hinungdan sa diha-diha nga kamatayun. (BANAT NEWS)