Executive assistant ni Rama nanion og armas

CEBU, Philippines – Nakatulog sa prisohan ang usa sa mga executive assistants sa mayor dinhi sa dakbayan sa Sugbo human kini gipasanginlan nga nanion og armas, niadtong Domingo sa gabii diha sa Dakit 3, Tres de Abril, Barangay Labangon, Cebu City.

Ang gisikop sa kapulisan naila nga si Dennis Jabonero, 61, nagpuyo sa 727 Tres de Abril sa maong barangay.

Samtang ang mga mireklamo mao sila si Joseph Biñas, 32, taga 258 Tres de Abril ug Jefferson Gayo, 33, nagpuyo ra ‘sab sa maong lugar.

Matud pa ni Police Officer Two Bernard Nebria sa Punta Princesa Police Station nga nahinabi sa Banat News, gikatahong hubog si Jabonero atol sa maong hitabo. Wa masayod ang mga biktima kun nganong kalit silang gipangtionan og armas ni Jabonero. Dali silang nanawag og pulis hinungdan sa pagkasikop niini.

Nakuha gikan ni Jabonero ang usa ka caliber .9mm Luger Pistol nga sumala giisyu sa Cebu City government.

Gikompirmar ni Atty. Dominic Diño sa Human Resource Development Office sa City Hall nga casual employee si Jabonero.

Si Bise Mayor Edgardo Labella mopadala og suwat kang Jabonero pag-esplikar sa hitabo ug paabuton nila ang pormal nga reklamo batok sa maong kawani aron makahimo sila og imbestigasyon, susihon pa usab kini iya ba gyud sa siyudad ang maong armas.

Gipasakaan na og kasong grave threats kagahapong adlawa ang dinakpan, diin gipasabot ni Nebria nga lagmit kini makagawas sa bilanggoan kun maka- piyansiya.

Samtang sa paghupot og armas ni Jabonero giingon nga subayon pa kini sa kapulisan kung sakto ba sa papel si Jabonero. - /EIM) (BANAT NEWS)