Traffic enforcers masakit sa pagbuwad sa init

CEBU, Philippines -  Mga kugihan nga traffic enforcers nga sakop sa Cebu City Traffic Operations Management (CITOM) gigantihan sa usa ka pharmaceutical company pinaagi sa paghatag kanila og libre nga check-up aron ilhon kun wala ba sila makasinati og kakuwang sa Vitamin D sa lawas tungod sa kanunay nga pagbuwad sa init sa adlaw.

Si Jonathan “Joy” Tumulak, operations chief sa CITOM, mitug-an nga 50 nila ka traffic enforcers ang girekomendar nga maoy makapahimulos sa prebeliheyo nga gihatag sa United Laboratories (Unilab) Inc.

Ang opisyal sa CITOM miingon nga ang mao nga matang sa laboratory examination nagkantidad og kapin sa P5 mil  kun adto sa mga private laboratories himuon. Ang kuwang og Vitamin D usahay mosangpot gani og kamatayon.

Matud ni Tumulak nga kadtong mga traffic enforcers nga daghan kaayo og dinakpan nga mga masalaypong drayber maoy ilang gipa-checkup ug gipakuhaan og dugo aron himoan og laboratory examination  adto sa Manila.

Gihulagway ni Tumulak nga kugihan kadtong mga traffic enforcers nga moabot og kapin 40 ka draybers ang ilang madakpan sa usa ka buwan. (RUB)  (BANAT NEWS)